29 de nov. de 2012

APAGÓN CONTRA OS RECORTES

-->
Venres 30 de novembro
20:00 h.
Praza Massó
A asemblea xeral da ANPA do pasado 14 de setembro decidiu adherirse a Alianza Social de Bueu, plataforma de protesta formada por colectivos do pobo sensibilizados coa problemática dos recortes nos servizos públicos; recortes que afectan tamén ao ensino e polo tanto ao dereito á educación dos nosos fillos e fillas.
En consecuencia, animámosvos a participar na acción de protesta que vai ter lugar o vindeiro venres 30 de novembro, apagando as luces da casa de 20:00 a 21:00 h. e acudindo á concentración na Praza Massó ás 20:00 h. provistos de VELAS que se acenderán simbolicamente para tratar de iluminar o incerto futuro que nos agarda.

--> CARTEL DA CONVOCATORIA

28 de nov. de 2012

A PROTESTA DOS CALDEIROS DEU RESULTADO


Hai un par de semanas os medios de comunicación fixéronse eco da protesta dos caldeiros que idearamos para tratar de chamar a atención das autoridades educativas sobre os graves problemas que padecía o centro e que eran, basicamente: as goteiras no ximnasio e no vestíbulo de entrada, as filtracións de auga no deposito de combustible da calefacción, o enganche, que faltaba, do sistema contra incendios á rede de auga municipal, e o ascensor, que non funcionaba.
A resposta dos medios foi sorprendente. Os caldeiros chamaron a atención incluso de canles de televisión de ámbito nacional. O interese que demostraron só foi superado pola celeridade coa que a Consellería de Educación se puxo a arranxar os problemas; ao día seguinte do da aparición na prensa dos caldeiros xa había un par de empresas chamando ao colexio para empezar a traballar.
Dende logo congratulámonos da rapidez coa que a administración deu resposta as nosas demandas, aínda que non podemos deixar de ser críticos co feito de que houbera que recorrer ao espectáculo dos caldeiros para chamar a súa atención, sobre todo tendo en conta que detrás desta idea dos caldeiros hai moitos meses de peticións por escrito á Consellería (chegouse a mandar unha carta cada semana) que non serviron para absolutamente nada.
A data de hoxe, sen contar deficiencias de menor calibre, xa temos conectado o sistema antiincendios e arranxado o tema das filtracións na caldeira da calefacción. As goteiras están en proceso, pois van precisar da substitución da cuberta superior do ximnasio, pero confiamos en que a solución sexa definitiva. O que falta é o ASCENSOR. Este non precisa de arranxo ningún, só que se contrate o servizo de mantemento pertinente para que poida empezar a utilizarse.
Dende a ANPA insistimos na urxencia de poñer a andar o ascensor, pois considerámolo un equipamento básico nun centro de ensino. Hai outras cousas que poderiamos reclamar (e que reclamaremos) como por exemplo o acondicionamento do patio de entrada ao colexio, convertido estes días de chuvia nunha especie de piscina, pero tamén entendemos a necesidade de priorizar as actuacións, polo que de momento imos concentrarnos no tema do ascensor.
Reiterámoslle pois a Consellería de Educación á imperiosa necesidade de atender a esta demanda do mesmo xeito que fixo coas demais problemáticas urxentes que se lle plantexaron a través da protesta dos caldeiros.

27 de nov. de 2012

RESULTADOS DAS ELECCIÓNS AO CONSELLO ESCOLAR

En total votaron 74 nais e pais. Tralo reconto das papeletas, as persoas que saíron elixidas para formar parte do Consello Escolar foron Xabier Framil Barreiro e Mª Dolores Docampo Diéguez.

16 de nov. de 2012

ELECCIÓNS AO CONSELLO ESCOLAR

O vindeiro martes 27 de novembro son as eleccións ao Consello Escolar do centro, órgano no que ademais da ANPA están directamente representados os pais e as nais do alumnado a través dos/as candidatos/as que saian elixidos/as.

No enlace de embaixo tendes toda a información sobre o proceso e os nomes dos candidatos/as que se presentan.

--> ELECCIÓNS CONSELLO ESCOLAR
-->

7 de nov. de 2012

Programa Medrando á par (antigo Preescolar na casa)



O programa Medrando á par ven a substituír ao desaparecido Preescolar na casa, que ofertaba directamente a Xunta de Galicia de maneira gratuíta. O actual programa ofértao unha asociación de carácter educativo e ten un custo de 30 € ao trimestre.
A presentación do programa terá lugar no colexio o luns 12 de novembro ás 16:00 h.
Se necesitades máis información podedes poñervos en contacto con Maite a través do teléfono 676 879 528 ou do correo electrónico medrandoapar@gmail.com
No enlace de embaixo podedes acceder á carta de presentación do programa por parte da Asociación Medrando á par.

MAGOSTO-SAMAÍN

¡A VER SE VAI DESTA!

Venres 9 de novembro
17:00 h.
Praza Massó
A Federación das ANPA de Bueu (constituída por tódalas ANPA dos colexios do pobo) intentará organizar outro ano máis un MAGOSTO-SAMAÍN o vindeiro venres 9 de novembro, a partir das 17:00 h., na Praza Massó.
Os pais e nais que desexen colaborar na preparación da festa (sobre todo para picar as castañas) poden achegarse sobre as 16:00 h.
Haberá actividades de animación para os rapaces e rapazas e castañas para todos. Se Se inda queda algunha, tamén faremos a tradicional exposición coas CABAZAS DE SAMAÍN que traiades.
En caso de moi mal tempo volveremos cambiar de día. Se tendes dúbidas podedes consultar o blog da ANPA da Pedra se se fai ou non.
Colabora na organización o Concello de Bueu.

6 de nov. de 2012

MENÚ NOVEMBRO

Xa podes consultar o menú do mes de novembro na páxina do COMEDOR. Desculpade a demora en subilo.

XVII CARREIRA PEDESTRE SAN MARTIÑO. II MEMORIAL PACO CABANILLAS.

   O Club de atletismo "Corredoiras" de Bueu organiza o vindeiro domingo 11 de novembro a tradicional carreira de San Martiño. Os rapaces e as rapazas poden anotarse directamente no colexio (en Infantil levaron unha folla a casa para que lla cubrades). Tende en conta que este ano non se permite a inscrición o mesmo día da proba.
   O domingo, a ANPA vai colaborar co club repartindo os dorsais aos participantes do colexio.
   Sería interesante que os nenos e nenas inscritos/as levaran a camiseta ou o chándal do centro se é posible.
   Embaixo deixámosvos un enlace onde podedes consultar tódolos detalles desta proba deportiva.

--> CARREIRA PEDESTRE SAN MARTIÑO 2012

2 de nov. de 2012

Ao final houbo que tirar a toalla

Intentámolo, pero a chuvia non nos deixou. O MAGOSTO SAMAÍN aprázase ata o venres 9 de novembro, á mesma hora (17:00 h.), se o tempo nolo permite. Sentímolo.

¡FAISE O MAGOSTO-SAMAÍN!

Por se tiñades dúbidas, confirmámosvos que o MAGOSTO-SAMAÍN previsto para hoxe a partir das 5 da tarde, VAI ADIANTE, así que animádesvos e baixade á Praza Massó.
Lembrámosvos que haberá xogos e activades para rapaces e rapazas, e castañas asadas para pequenos e maiores.

Federación das ANPAS de Bueu.

1 de nov. de 2012

Nota informativa 29/10/12

Nesta nota informabamos entre outras cousas do MAGOSTO-SAMAÍN do venres 2 de novembro, e das novidades en relación coas actividades extraescolares. Podedes consultala nas seguintes ligazóns:

1ª páxina da nota
2ª páxina da nota